1Þú átt erfitt með að skilja hvað aðrir segja
Þú heyrir hljóðin en greinir ekki orðin
2Þú átt erfitt með að heyra í hávaða
Veislur, veitingahús, samkvæmi, erfið hlustunarskilyrði sem geta reynst heyrnarskertum erfið
3Þú skilur illa raddir barna og kvenna
Heyrnarskertir eiga oft erfitt með að greina raddir sem eru á hærra tíðnisviði eða veikari
4Þú skiptir oft um eyra í símtölum
Að skipta í sífellu um eyra þegar hlustað er í síma getur bent til erfiðleika og þreytu vegna heyrnarskerðingar
5Þú ert með suð eða són í eyrum
Eyrnasuð(tinnitus)er algengt meðal heyrnarskertra
6Þú þreytist fljótt í samræðum
Ef mikil einbeiting við að hlusta á samræður leiðir til líkamlegrar og andlegrar þreytu er ástæðan skert heyrn
7Þú ert með sjónvarp of hátt stillt fyrir aðra
Ef þú þarft sífellt að hækka í sjónvarpinu eða aðrir biðja þig um að lækka í því ert þú líklega með skerta heyrn
8Aðrir segja þig tala of hátt eða óskýrt
Skert heyrn breytir því hvernig þú skynjar og heyrir hljóð og jafnvel eigin rödd og eigin framburð
Algengar spurningar
Hvað eiga þessir ágætu tónlistarmenn á myndinni hér að ofan sameiginlegt ?
Jú, þeir eiga allir við vandamál að stríða vegna heyrnarskerðingar eða eyrnasuðs (tinnitus)
Skoðum sögu nokkurra þessarra heiðursmanna (því miður engar konur á listanum enda heyrnarskerðing algengari meðal karla):
- Eric Clapton er einn merkasti og frægasti rokk- og blúsgítarleikari samtímans. Hann hefur þurft að glíma við mikið og þrálátt eyrnasuð sem að öllum líkindum hefur orsakast af miklum hávaða á tónleikum hans í upphafi ferilsins. Clapton var þekktur fyrir að keyra magnara í botni jafnt á tónleikum sem í hljóðverum, jafnvel svo að félögum hans þótti nóg um.
- Chris Martin er forsprakki og aðalsöngvari hinnar heimsfrægu hljómsveitar Coldplay sem notið hefur sívaxandi vinsælda allt frá fyrstu hljómplötu þeirra pilta árið 2000. En það sem fæstir vita er að hann hefur þjáðst af eyrnasuði (tinnitus) allan síðasta áratuginn.
Söngvarinn sagði í viðtali við Daily Mail nýlega “Maður hugsar ekki nógu vel um eyrun og heyrnina fyrr en þú ert þegar kominn í vandræði. Ég er búinn að vera með tinnitus síðustu 10 árin en eftir að ég fór að nota hávaðahlífar hefur vandamálið ekkert versnað, sem betur fer. En ég vildi óska þess að ég hefði byrjað fyrr. Nú nota allir hljómsveitarmeðlimir sérsmíðuð hlustartól sem vernda heyrn okkar.“
- Sting. Fyrrum aðalsöngvari og bassaleikari hljómsveitarinnar Police er enn einn vinsælasti tónlistarmaður veraldar. Hann varð fyrir heyrnarskaða af völdum hávaða á tónleikum undanfarinna áratuga. Sting er nú mjög áhugasamur um mikilvægi heyrnarverndar og vinnur með ýmsum samtökum og heilbrigðisstofnunum til að vekja athygli á verndun heyrnar.
- Jeff Beck lenti í 5. Sæti yfir bestu gítarleikara heims í kosningu tónlistartímaritsins Rolling Stone (“100 Greatest Guitarists of All Time”). Þessi fjölhæfi gítarleikari hefur lengi vakið athygli fyrir frammistöðu sína á sviði þungrar rokktónlistar, raftónlistar, framsækins rokks og jazz-skotinnar rokktónlistar. En hann hirti ekki um að hlífa heyrninni og hefur þjáðst af slæmu eyrnasuði um árabil.
- Phil Collins er fyrrum trommuleikari og söngvari hljómsveitarinna Genesis og síðar sóló-listamaður sem fengið hefur margvísleg verðlaun, bæði Óskarsverðlaun og Grammy verðlaun fyrir tónlist sína. Collins þurfti að lokum að aflýsa öllu frekara tónleikahaldi vegna alvarlegrar heyrnarskerðingar sem gerir honum ókleift að flytja tónlist sína.
- Will.i.am: Einn áhrifamesti tónlistarmaður síðari ára. Hann er einn stofnenda The Black Eyes Peas og eftirsóttur framleiðandi. Will.I.Am hefur um árabil verið með svo slæmt eyrnasuð (tinnitus) að hann segist nánast viðþolslaus. Hann segist þurfa að vinna við tónlist og vera með tónlist í eyrunum helst allan sólarhringinn því að það sé það eina sem nær að dempa þann sífellda són sem hann er með í eyrunum og slá á streituna sem fylgir þessu slæma eyrnasuði.
- Neil Young sló ungur í gegn með Buffalo Springfield og síðar með Crosby, Stills, Nash & Young áður en hann sneri sér alfarið að eigin tónlist og þykir með merkustu tónlistarmönnum síðustu áratuga. Hann hefur gefið út á fjórða tug hljómplatna og komið að gerð margra fleiri. Vegna hávaðaskaða vegna háværs tónlistarflutnings hefur hann þjáðst að eyrnasuði (tinnitus) í mörg ár. Þó að hann flytji oft hljóðlátar perlur með kassagítarinn einan að vopni þá skellir hann enn í mjög háværa rokktónlist á tónleikum sínum svo hann virðist lítið hafa lært af fyrri mistökum.
- Ozzy Osbourne: Allir sem séð hafa þáttaröðina um Ozbourne fjölskylduna gera sér fljótt grein fyrir að húsbóndinn heyrir afskaplega illa. Ozzy er ein af stærstu stjörnum þungarokksins en hann var aðalsöngvari hljómsveitarinnar Black Sabbath allt þar til hljómsveitin lauk ferlinum á árinu 2019. Hávaði á tónleikum þeirra var ætíð mikill og er örugglega ástæðan fyrir mikilli heyrnarskerðingu hans í dag.
- Brian Wilson, forsprakki og aðal lagahöfundur hinnar fornfrægu hljómsveitar The Beach Boys hefur verið verulega heyrnarskertur á hægra eyra allt frá unga aldri. Þetta hindraði Brian þó aldrei í tónlistarsköpun sinni. Hann hefur samið og útsett tónlist og er enn að.
- Paul Stanley, sem stofnaði amerísku rokk-hljómsveitina KISS, fæddist með vissan galla, microtia, sem leiðir til þess að ytra eyrað hægra megin er verulega vanþroskað. Hann var alinn upp í mikilli tónlistarfjölskyldu og ætlaði sér alltaf að verða tónlistarmaður þó að hann heyri í raun nær eingöngu með vinstra eyra.
Paul Stanley hefur lengi unnið náið með stofnunum og góðgerðarsamtökum sem hvetja ungt fólk og tónlistarmenn til að gæta að heyrnarheilsu sinni og hann segist ávallt nota heyrnarhlífar til að vernda þá heyrn sem hann hefur enn og ætlar sér ekki að tapa!
Þessir og margir aðrir tónlistarmenn hafa orðið fyrir heyrnartapi eða fengið eyrnasuð af völdum mikils hávaða sem tengist atvinnu þeirra og hávaða. Saga þeirra ætti að vera víti til varnaðar og hvetja alla til að huga að heyrnarvernd, nota heyrnarhlífar í öllum tilfellum þegar hávaði fer í hættuleg mörk. Enginn vill þurfa að fórna þeim lífsgæðum sem felast í að hlusta á tónlist !
Við skorum á heyrnarskerta íslenska tónlistarmenn að gefa sig fram við okkur hjá HTÍ svo að við getum skrifað heimfærða frétt með sömu fyrirsögn!
janúar 2020
Bandarísk rannsókn segir heyrnartap, heyrnarskaða og eyrnasuð algengt meðal slökkviliðsfólks.
Allt að helmingur slökkviliðsmanna sem þátt tóku í nýlegri könnun segjast vera með eyrnasuð (tinnitus) og um þriðjungur segist eiga við heyrnarvandamál að stríða.
Þannig segjast 36% svarenda vera með heyrnarskaða eða skerta heyrn, 29% með væg-meðalslæm einkenni en 7% með verulegt heyrnartap.
Af 42 slökkviliðmönnum sem spurðir voru segjast 52% ekki vera með neitt eyrnasuð (tinnitus) á meðan 48% þeirra segjast þjást af eyrnasuði.
Eyrnasuð – verulegt vandamál
Niðurstöður:
Samkvæmt eigin mati töldu þátttakendur eyrnasuð/tinnitus
- ekki vandamál – 17%
- lítilsháttar vandamál – 9%
- vægt-meðalslæmt vandamál – 17%
- slæmt-mjög slæmt – 5%
Alls telja 31% aðspurðra að eyrnarsuð sé vandamál fyrir sig.
Eyrnasuð truflaði heyrn 15 svarenda, hafði áhrif á vitræna getu hjá 14, truflaði svefna og slökun hjá 12, hafði neikvæð áhrif á sjálfsstjórn hjá 11, hafði neikvæði áhrif á lífsgæði hjá 10 og truflaði tilfinningalíf hjá 9 aðspurðra.
Þátttakendur komu frá nokkrum slökkvistöðvum í Michigan-borg í Bandaríkjunum.
Slökkviliðsmenn í áhættuhópi
Rannsóknin beindist sérstaklega að slökkviliðsmönnum þar sem þessi starfsgrein býr við erfið skilyrði sem geta haft neikvæð áhrif á heyrn og valdið heyrnarskaða.; Sírenuvæl, þokulúðrar, hávær búnaður, brothljóð þegar rífa þarf byggingar og brjóta upp hurðir og veggi, rjúfa þök o.s.frv. Þá verða þeir fyrir skertum loftgæðum, reykmengun og mögulega skaða af völdum efna sem valdið geta heyrnarskaða.
Rannsóknin ber heitið “Tinnitus and Self-Perceived Hearing Handicap in Firefighters: A Cross-Sectional Study”, birtist nýlega í International Journal of Environmental Research and Public Health.
Heimild: www.hear-it.org ; International Journal of Environmental Research and Public Health
Birting: Nóv 2020
Notkun heyrnartækja sýna virkni í meðferð á eyrnasuði samkvæmt nýlegri rannsókn.
Japönsk rannsókn hefur leitt í ljós að marktækur árangur næst í meðferð á eyrnasuði (tinnitus) þegar heyrnartækjum er beitt á réttan hátt.
Þátttakendur í rannsókninni voru með skerta heyrn og eyrnasuð (tinnitus) og fengu stillt á sig heyrnartæki sem hæfðu heyrnarskerðingunni. Allir notendur töldu notkun heyrnartækjanna hafa dregið verulega úr eyrnasuðinu og þeim áhrifum sem eyrnasuð hefur á líf þeirra.
Margt fólk með skerta heyrn þjáist einnig af eyrnasuði/tinnitus og margir þeirra sem eru með eyrnasuð telja sig hafa einhverja heyrnarskerðingu samhliða eyrnasuðinu þegar þau mæta til heyrnarmælingar.
Heyrnartækin auka hljóðmagn heyrnar
Þegar heyrnarskerðing er meðhöndluð með heyrnartækjum eru viss hljóð, sem hinn heyrnarskerta skortir, mögnuð upp. Þetta eykur s.k. audiological input og virðist draga úr eða ,,breiða yfir“ eyrnasuðið og draga þannig úr vanlíðan eyrnasuðssjúklinga.
Höfundar rannsóknarinnar segja að niðurstöður þeirra styðji fyrri rannsóknir sem hafa sýnt að notkun heyrnartækja geti sýnt ágætan árangur við eyrnasuði.
Vísindagreinin ber heitið “Retrospective evaluation of secondary effects of hearing aids for tinnitus therapy in patients with hearing loss”, og birtist í tímaritinu Auris Nasus Larynx.
Heimild: www.ncbi.nlm.nih.gov
Birt: janúar 2021
Fullheyrandi fólk á erfitt með að ímynda sér hvernig heyrnarskertir heyra.
Vefsíðan www.hear-it.org er stútull af fróðleik um margvíslegt efni sem tengist heyrn og heyrnarskerðingu.
Á vefsíðunni má meðal annars finna hljóðdæmi um það hvernig mismunandi heyrnarskerðing hljómar. Einnig eru þar dæmi um eyrnasuð (tinnitus) o.fl.
Með því að kilkka á myndina hér að ofan getur þú opnað vefsíðuna í sérstökum flipa og spilað þessar hljóðskrár.
